عزومة رمضان بقلم بتول احمد

تاريخ النشر

عزومة رمضان

كنا معزومين عند اخويا هو لسه متجوز جديد

اتحايلت علي مراته اجي بدري اطبخ معاها حلفت هي ما اجي الا ع المغرب

المهم جيت انا وابني وقعدنا عند ماما و قبل المغرب بساعة مرات اخويا اتصلت عليا قالتلي لو انا فاضية اطلع اساعدها

ف طلعت و ابني طلع ورايا فضل يقولها يا طنط انا جعان قولتله خلاص ياحبيبي شوية وهناكل كلنا ف اللمه

ف هي قالت خلاص ياعسل كلها ساعه وهنفطر وطنشت ابني

ف حين كان ف المطبخ كان ف موز فاكهه كانت ع الاقل اديته صوباع موز

ساعدتها و تبارك الله عامله اكل و اصناف كتير و الاكل كان حلو فعلا

ومعملتش طبق لابني

ابني 5 سنين يعني بياكل مش مثلا بيرضع صناعي لسه

ف اخويا قالها انا شايف الكل قدامه اطباق الا حمزه ف هي قامت حضرتلة الطبق دة

و بدل ما تعمله كوبايه عصير زينا حطتله فراولة بالشكل دا

ف شيلت الطبق ومحدش واخد باله و ركنتة ورايا وبقيت باكله معايا و اديته العصير بتاعي

ولما خلصنا أكل صورته عشان لحد الان مش لاقيه تحليل للموقف اللي هي عملتو

عارفين الطبق فيه ايه حته من زور بطه  وواحدة ممباروجناح فرخه وحبيتين فراوله بس 

مع انها عاملة اصناف كتير وبعدها

غسلت مكانها الاطباق و لمعت ليها المطبخ و قالت هتعمل هي سحلب و حاجات سخنه و برضو معملتش حساب ابني ولا حسابي 

ف خلصت مواعين وقعدت لاقيت الكل بيشرب الا انا

و ماما فضلت تشرب ابني معاها

اخويا قالها معملتيش حساب اختي ليه قالتله ماهي كانت بتنضف المطبخ ف سيبتها تعمل الشغل براحتها

قالها شغل هي خدامه ولا ايه

حسيت ان هيحصل خناقة بينهم ف قولتله ماهو اسمه شغل اومال اسمه ايه وبعدين انت مالك هي طبخت كتر خيرها ف فين المشكله ما اساعدها دي اختي

قالت تسلمي

قولتلها ممكن معلش تعمليلي بس كوبايه شاي

قالتلي نصيآ كده ( ما تقومي تعملي لينا شاي وتكملي شغلك ف المطبخ لسة ورانا غسيل الحمام عشان تبقي الشقة عنب ههههه )

بصيت لماما وانا حقيقي عيني دمعت ف قولتلهم هستأذن عشان انزل اصلي عند ماما وهمشي عشان حماتي تعبانه شوية

ونزلت

سمعت صوت زعيق

استناها حتي تعتذرلي ولا تطيب خاطري بكلمه ولا تقولي كنت بهزر مش متخيله انا كنت جايه اتهان انا وابني ولا ايه

بعدها اخويا رن عليا لما مشيت قالي معلش هي هزارها تقيل شوية وهي عايزه تكلمك تراضيكي البنت عاندت قالتله اراضي مين انت عايزني اعمل حاجه انا مش مقتنعه بيها و فضلت تزعق اخويا قالي اقفلي هكلمك بعدين

المفروض اتعامل مع دي ازاي ولا اعاتبها ازاي يشهد ربنا ان كنت بعاملها كانها اختي لان كان نفسي يكون ليا اخت

اسفة اني طولت لكن محتارة وجوزي جالي قاطعيها ومالكيش دعوة بيها وفي نفس الوقت امي بتقولي ماتقاطعيش اخوكي وبيته بسببها 

بـ الله عليكم قولولي اعمل ايه

نقلتها لكم بتول احمد