قصة الجليسة كتابة حماده هيكل كاملة

قصة الجليسة كتابة حماده هيكل
الجليسة
كاملة
أخيرا قدرت أخد أجازة من الشغل وهروح لبيت طليقتي عشان اشوف بنتي أنفصلت عن مراتي من 3 سنين لمشاكل كتير بينا حاولت كتير أصلح علاقتنا .وأن الأمور متوصلش بينا للانفصال خصوصا واني عندي بنوته جميلة أسمها جنيفر
عمرها ٦ سنين دلوقت..بس للأسف فشلت
أنا جوني وعايش في ولاية فلوريدا .. في مقاطعة ميامي بيتش واللي تبعد ساعتين عن مكان إقامة بنتي
وصلت هناك والدة جنيفر رحبت بيا ..أحنا بنحاول نظهر أننا اصدقاء ومفيش بينا شئ عشان دا ميأثرش على البنت
أتغدينا وقضيت وقت لطيف مع جنيفر ..
وانا معاها سألتني ليه انت مش عايش معانا
فهمتها أنه انا وماما منفصلين وأن كل واحد فينا دلوقتي بقى ليه حياته ..ومش من السهل نرجع لبعض
قالتلي
نفسي انك توصلني المدرسة الصبح زي صاحبتي
وتكون معايا دايما تلعب معايا وتذاكرلي
أخدتها في حضڼي وطبطت عليها ومسحت على شعرها
وانا بقول ..متزعليش يا حبيبتي ڠصب عني
بس انتي عارفه ومتأكدة أنك أغلى حاجة في حياتي
وأني لازم أزورك من وقت للتاني عشان أطمن عليكي
في الوقت دا جات مامتها وباين على ملامحها الحزن
سألتها مالك..قالت أن أختها تعبانه ولازم تروحلها
وطلبت مني أقعد مع البنت اليومين دول لغاية ما ترجع
لأنها مش حابه تبهدلها معاها في المستشفى
وافقت على المقترح بتاعها ..وفرحت أني هقضي يومين مع بنتي لوحدنا ومامتها بعيد عننا
بعدها فضلنا نلعب أنا وجنيفر في الجنينه بتاعت البيت
بالكورة وهي كانت مبسوطه جدا..بس مش أكتر مني
حسينا بالجوع بعد المغرب ..دخلنا المطبخ وجهزنا اكل
وبعد ما أكلنا قعدنا شوية قدام التليفزيون
وعلى الساعه 8 جرس الباب رن
ولما فتحت لقيت ست في منتصف الاربعينيات من عمرها
باين عليها الإجهاد والتعب..فقولتلها انتي مين
قالت أنا جليسة الأطفال والدة جنيفر أتصلت بيا
من ساعة وطلبت مني أروح اقعد_معاها في البيت
لحد ما ترجع من عند أختها
أستغربت من كلامها وقولتلها
_طيب أيه لزوم جليسة الأطفال وانا موجود مع البنت
جنيفر جات وسلمت على الست دي
وقالت أهلا فيرونيكا وحشتيني
أخدتها في حضنها وبصت لي وقالت
_ها ممكن أدخل بقى
سمحتلها تدخل وقفلت الباب رغم اني مش فاهم ليه
طليقتي كلمتها ..وايه السبب هي مش مطمنة على بنتي وهي معايا !!
المهم اننا طلعنا ننام وطبعا نمت مع جنيفير في نفس الأوضة رغم انها بتنام لوحدها عادة..بس هي قالت عايزه انام جنبك يا بابا
سألتها عن الجليسة دي وقالت
_أنا بحبها اوي وهي كانت دايما بتيجي لما ماما تغيب
بتلعب معايا وبتحبني وساعات كانت بتجيب بنتها
الصغيرة ونلعب كلنا سوا ..بس هي ليها فترة مجاتش هنا
واضح ان البنت بتحبها ..بس لسه مش فاهم ليه مامتها كلمتها عشان تيجي تقعد معاها وانا هنا!