رواية بيت الاميرية بقلم اماني السيد

رواية بيت الاميريه بقلم اماني سيد
بقولك ايه يا منصور
خير يا هاديه
احنا عندنا ٤ عيال والخامس جاى فى الطريق
منك لله وليه ارنبه كل سنه عيل غير الحمل اللى مابيكملش
احمد ربنا انت مش شايف اخوك نفسه في ضفر عيل ومش عارف وراح لدكاتره ياما ومافيش أمل منه
طيب منا عندى العيال اهو وبأكلهم واشربهم بالعافيه وهو ما شاء الله على قلبه اد كده عشان معندوش عيال ولا مسئوليات
طيب انا بقى جاتلى فكره إنما ايه
وانتى من امته بتعرفى تفكرى انتى بتعرفى تخلفى بس
اسمع منى وانت هتكسب
ايه رأيك العيل اللى فى بطنى ده اديه لاخوك يربيه
صمت حل بالمكان فقط نظرات متبادله بين هاديه وزوجها
ولما اديه لاخويا هستفاد ايه
بص انا كنت قاعده انهارده مع حنان مرات اخوك وهى قاتلى كده بشكل غير مباشر انها بتفكر تتبنى عيل عارف ده معناه ايه
ايه
إن هيجى واحد غريب ياخد اللى وراه واللى قدامه واخوك ممكن يكتبله كل حاجه بإسمه
انما بقى لو انت اديته عيل من عيالك ويا سلام بقى لو طلع ولد وقتها كل حاجه عند اخوك هتبقى بتاعتنا احنا وولادنا وغير كده معزتك عند اخوك هتزيد وهيبحبح ايده معاك شويه ومنها برضوا مش هيبقى غريب عنه ابن اخوه يعنى ابنه من لحمه
وافرضى طلب يكتبه بإسمه وقتها بقى هنعمل ايه
وقتها هيبقى ابنك وورث كل حاجه برضو يعنى فى الاخر هتصب فى ايدينا بس اخوك يعرف ربنا مافتكرش إنه ممكن يطلب طلب زى ده
تصدقى يا وليه فكره حلوه طيب افرضى العيل اللى فى بطنك ده جه بت وقتها هتعملى ايه
ولا حاجه واد زى بت بس انا قلبى بيقولى إنه واد
طيب انا هروح اتكلم مع اخويا واجس نبضه
روح اتكلم معاه ومش محتاجه اقولك وانت بتكلمه عايزاك تفهمه انك بتعمل كده عشان مصلحته عايزاه يشبط فى الموضوع ويشعشع فر دماغه كده
ماتقلقيش يا هاديه بس قبل ما اكلمه عندى سؤال
أسأل
قلبك مش هيوجعك لما تشوفى ابنك بيكبر قدامك وبيقول لواحده تانيه يا أما
لا يا اخويا مش هيوجعنى ولا حاجه اللى هيوجعنى الحوجه ومدت ايدى للى يسوا واللى ميسواش
بس كده ابنك هيتربى وحيد مش مع اخواته
ده هيبقى احسن من اخواته وهيبقى ابن عمهم يعنى اخوهم برضوا وانا هبقى اخد العيال واروح ازوره كل شويه
اعملى حسابك الموضوع ده مافيهوش راجعه يعنى مش هيكون فى ندم بعد كده
انا اللى قايلالك يبقى مش هرجع في كلامى ماتقلقش ولا هندم حد يكره يشوف ابنه بيتربى فى العز ياريت بس اخوك ومراته يقبلوا
تمام هروح ولما احى هبلغك قولتله ايه
اتفقنا
فى مكان آخر يجلس المعلم صقر فى المحل الخاص به بتجاره القماش ويشرب الأرجيلة الشيشه
دخل اليه منصور وجلس امامه على كرسى المكتب
نظر اليه صقر بطرف عينه ونفخ الدخان من فمه
مالك يا منصور شايل طاجن ستك ليه
مافيش انت عارف مراتى حامل وقربت تولد
المفروض تبقى فرحان ده رزق ربنا باعتهولك وانت مضايق ! يا اخى احمد ربنا على النعمه اللى معاك
المصاريف قطمت ضهرى
انا مش عايز العيل ده كفايه عليه اخواته
استغفر ربنا يا اخى غيرك مش لاقي ضفر عيل
خلاص إحنا فيها خده
أنت بتقول ايه انت اټجننت
بص يا صقر انا عندى ٤ عيال بنات وبنين يعنى ربنا عطانى ده وده فمش فارق معايا بقى اللى جاى ده نوعه ايه
انت خده ربيه واعتبره ابنك ولو عايز تكتبه باسمك كمان انا موافق
يعنى انت عايز تدينى ابنك انت بتتكلم جد
والله بتكلم جد يوم الولاده تيجى معايا المستشفى وتكتبه باسمك وخده
وامشى