صالحت بيك ايامي وسامحت بيك الزمن بقلم الكاتبة المبدعة رضوي بيومي

امك لمحتلي علي موضوع الخلفة قدام مرات اخوك.
ما هي معذورة بقالنا كم سنة متجوزين ومفيش نصيب حصل.
مش لدرجة تحرجني قدام مرات اخوك وتحسسني اني عاجزة.
دخلت اوضتي وانا صعبان عليا نفسي والكل بيقطم فيا حتي جوزي حسيت في عينه نظرة حسرة!
انا هتجوز بنت خالي.
ايه ! بتقول ايه !
اسم الله عليكي سمعك خف ولا ايه قالك هيتجوز يحبيبتي.
بصيت ناحيته وهو بيبعد عينه عني رجعت بصيت لحماتي وانا الدموع اتجمعت في عيني وانا باصة في اللاشئ
الفرح اول الشهر الجاي .
هطلقني .
نطقت بيها وانا متماسكة في ردة فعلي مش عيزاهم يشوفوني وانا مڼهارة
بس انا عايزك علي ذمتي.
وانا قولت هطلقني .
طلقها وخلصنا من همها ارض بور.
قالتها حماتي وهي بتسيبنا لوحدنا وكالعادة اتهنت وهو واقف!
انا هتجوزها واخلف حتة العيل وهتكوني انتي امه .
عايز تاخد ابن من حضڼ امه! انت ايه ماشي تظلم ف الناس انا اكتر واحدة عارفة حرمان الام من ضناها بطل ظلم .
قولتها بشبه اڼهيار مد ايده حوالين كتفي بعدتها عني في نفور
هتصل بأهلي ابلغهم يجوا وتخلص معاهم كل حاجة .
وتم الطلاق بينا بكل هدوء وحاجتي رجعتلي بس كسرة النفس اللي جوايا متلأمتش
نعم يا بابا.
بصي يبنتي انا مش عايزك تشيلي في نفسك حاجة ربنا موزع الأرزاق علينا كلنا بالتساوي كل واحد بياخد ال ٢٤ قيراط بتوعه وانتي لسا رزقك ونصيبك مجاش .
عارفة يا بابا ومش زعلانة.
وهو انا مش عارفك ده انا اللي مربيكي علي ايدي وعارف انك موجوعة عايزك ترضي بنعم ربنا عليكي .
الحمد لله راضية والله راضية.
قولتها وانا نبرة صوتي بتترعش بابا قام حضڼي وهو بيطبطب عليا لغاية ما هديت
عايزة انزل شغل يا بابا.
وهل انا حارمك من حاجة أو انتي محتاجة
مش قصدي والله انا عايزة الهي نفسي وحاجة تشغلني والاقي ذاتي .
لقيتي حاجة مناسبة طب
اتكلمت بحماس
لقيت وشغل قريب من البيت كمان.
خلاص موافق يست البنات.
بدات أشغل وقتي واتصالحت مع نفسي وحسيت بسلام غريب ونجحت في مجالي ولقيت نفسي اللي كانت ضايعة.
متقدملك عريس.
تاني يا ماما !
تاني وتالت ده انتي ست البنات الراجل هيجي بليل عشان
يعقد مع ابوكي.
هيترفض زي اللي قبله.
قولتها بتهكم وانا برمي جسمي علي السرير
والله حساها المرة دي غير وهتقولي امي قالت.
سرحت بتفكيري وحلمي في تكوين اسرة دافئة في طاعة ربنا وان مفيش راجل هيقبل العيب اللي عندي استغفرت ربنا وقومت اتوضيت وصليت حسيت براحة وسکينة لا توصف
هتفضلي باصة للسجادة كتير
اشمعنا أنا
مش فاهم.
اتنهدت وانا برفع عيني وبصيت ناحيته
اشمعنا انا اللي اتقدمتلي.
يمكن عشان حظي حلو.
انت عارف اني مطلقة
عارف.
عارف اطلقت ليه
مسالتش ومش عايز اعرف.
هقولك وانت ليك حق الاختيار أنا اللي طلبت الطلاق عشان جوزي كان هيتجوز عليا عارف ليه عشان عندي مشاكل في الخلفة.
قولتها وانا ببص في عينه بحاول اشوف منهم نفور أو نظرة شفقة ملقتش