رواية صاحب المفتاح بقلم عمرو راشد

اساسا سمعة الدهب هتبوظ ساعتها
قصدك ايه بالكلام دا يا أمجد
حاضر يا حبيبتي المهم عايزك تهدي
انا هادية هادية جدا
ربنا يهديكي أكتر وأكتر
ربنا يصبرني عليك
التظاهر بالغباء هو اذكى حل ممكن تستخدمه عشان تهرب بيه من أي مشكلة تقابلك غباء مصبوغ ب طيبة وضعف وخصوصا لو هتعملهم عشان ترضي غرور واحدة زي منال هو دا الحل الامثل بل الاذكى
يلا يا أمجد عشان تصلي الجمعة
حاضر يا حبيبتي انا صاحي اصلا من بدري
طب يلا قوم البس عشان تنزل تصلي
قومت بالفعل لبست الجلابية البيضا مع طاقيه بنفس اللون و مسكت السبحة في ايدي وعطرت نفسي
متتأخرش
احتمال اقعد مع واحد صاحبي بعد الصلاه بس متقلقيش مش هتأخر
المهم لما اتصل ترد فاهمني
حاضر يا حبيبتي
نزلت صليت وبعد ما خلصت ركبت العربية ومشيت كل فترة ببقا محتاج حالة من الهدوء استرخاء وسلام نفسي مش هعرف الاقيه غير عند واحد بس وصلت المكان اللي انا عايزه ونزلت من العربية جيبت فاكهة كتير وخضار و طلعت الشقة فتحت الباب و دخلت
السلام عليكم ورحمه الله وبركاته
ثواني ولقيتها خرجت من جوا وشها ابيض وطالع منه النور اسم على مسمى فعلا.. نورا
امجد انت جيت
ابتسمت في وشها الجميل وقولت
ايوا جيت
بصت للحاجات اللي كانت في ايدي وقالتلي وهي مبتسمة
ايه دا كله
دي حاجات بسيطة جبتها من عند سيدنا الحسين
يا بركة الله انت كنت بتصلي هناك النهاردة
ايوا ودعيتلك كتير أوي
ربنا يتقبل منك يارب يا أمجد
المهم انتي طمنيني على أحوالك
انا بخير الحمدلله مش ناقصني غير وجودك
دايما يارب تكوني بخير انا كمان والله يا حبيبتي مش ناقصني شئ في الدنيا غير وجودك جنبي بس هنعمل ايه بقا دا شغل
مينفعش حتى تخليهم يومين في الأسبوع على الاقل اقعد معاك اكتر
الرزق مش هيستناني يا نورا دي تجارة مع الله انتي عايزاني مروحش الشغل و أقطع عيش الناس الغلابة اللي معايا
لا طبعا ميرضنيش
ربنا هيجازينا خير ان شاء الله على اللي بنعمله بس انتي دعواتك معانا
بدعيلك والله في كل صلاه ومع كل اذان يا امجد ربنا يخليك ليا يا حبيبي
طب ايه يا ست البنات مش هناكل حاجة من ايدك الحلوة
ايه دا يا امجد انت نسيت ولا ايه احنا صايمين
يا الف نهار ابيض تصدقي كنت نسيت فعلا الشغل واخد عقلي كله والله بس الحمدلله طالما بنرضي ربنا يبقا نستحمل أي حاجة
طب انا هقوم احضر الفطار بقا
براحتك خالص وانا كمان هدخل اصلي
هتصلي ايه لسة العصر مأذنش
هصلي ركعتين شكر لله بركة اني شوفتك وقعدت معاكي انا طول الاسبوع بدعي ربنا ليل ونهار ان الايام تجري بسرعة عشان يوم الجمعة ييجي واشوفك
طب ايه رأيك لو نخلي كلام الغزل دا بعد الفطار احسن
نخليه طبعا يا ست البنات
نورا دخلت جوا تحضر الفطار وأنا كمان دخلت الأوضة على اعتبار اني هصلي ولكن أنا فتحت تليفوني واتصلت ب منال
خير يا أمجد
خير يا حبيبتي انا بس حبيت اني هفطر برا النهاردة
عند امك
لا دي عزومة واحد صاحبي عاملها بتاعت كل سنة دي مانتي عارفاها
وهتخلص امتا
لسة مش عارف بس عموما انا مش هتأخر
براحتك خالص يا أمجد
مش عايزة حاجة وانا جاي
السكة اتقفلت بعد شوية خرجت وفضلت قاعد مع نورا نتكلم لحد ما جه معاد الفطار وقعدنا ناكل بعدها مقعدتش كتير عشان كان لازم امشي
استودعك الله يا نورا
كان المفروض تبات معايا النهاردة يا أمجد
اعمل ايه بقا الرزق بينادي و انا لازم اروح
طب هترجع امتى
الله اعلى واعلم
ربنا يحفظك ليا يا حبيبي
جميل انك تلاقي حد نقي ونضيف من جواه لسة ابيض كأنه مولود امبارح بس تفتكر بقا الدنيا هتحافظ عليه لحد امتى بعد الهدوء اللي كنت فيه دا محتاج ارجع افوق تاني وعشان كدا اتجهت بالعربية على شقة ناهد فتحت الباب و دخلت لقيتها قاعدة في الصالة ولابسة قميص نوم لونه اسود اول ما شافتني قامت وجات لحد عندي
اهلا بالمعلم أمجد العطار سيدي وتاج راسي كنت حاسة انك جاي النهاردة
قلبك كبير يا ناهد
بعدها ضحكت ضحكة خليعة وهي لسة بتقرب مني
طب اسمعيني بس الاول انا محتاجك تنفذي اللي اتفقنا عليه
وهو احنا اتفقنا على ايه
شكلك هتتعبيني يا ناهد انا عايزك فايقة معايا
فايقة وسامعاك
أنتي هتظهري في حياه منال
لا دا الكلام كبير أوي كدا منال مراتك
منال مراتي!!
يتبع أنتي هتظهري في حياه منال
لا دا الكلام كبير أوي كدا انت قصدك منال مراتك
بالظبط منال مراتي
وهعمل معاها ايه
دور الصاحبة اللذيذة المغرورة عايزك تقربي منها تدخلي حياتها عايزك في اقل وقت تبقي اقرب واحدة ليها
طب افهم الاول انت عايزني اعمل كدا ليه
سحبتها من ايدها ومشيت لحد ما قعدت على الكنبة وهي قعدت جنبي وبدأت اكمل كلامي
هي دي اللحظة المناسبة اللي نعرف ندخل فيها ل منال
اشمعنا الوقت دا بالذات
متعودتش منك على المجادلة اتعودت على السمع وتنفيذ الاوامر وهو دا العهد اللي بيني وبينك
كل اللي تتمناه انا هنفذه بس انا عايزة افهم
سندت ضهري و ابتسمت وبعدها كملت كلامي
كل حاجة في الدنيا ممكن تعرفي تكسبيها الا حاجة واحدة بس تفتكري ايه هي يا ناهد
الحب
راحة البال
الحب سهل تشتريه يعني مثلا لو انا نزلت دلوقتي و وزعت فلوس على كل الناس اللي في الشارع هيحصل ايه هيحبوني وبكدا اكون اشتريتهم منال معاها فلوس تقدر تشتري بيها كل اللي تحلم بيه بس الحاجة الوحيدة اللي متقدرش تشتريها هي راحة البال
والأولاد برضو يا أمجد متنساش انك لحد دلوقتي لسة مخلفتش منها
بس لو سيبتها هتخلف من غيري و دا اكيد لان مفعول حباية منع الحمل هيروح من جسمها
وهي عمرها ما راحت ل دكتور
كنت بتفق معاهم قبل ما نروح لأي واحد منهم كانو بيقولو نفس الكلام اللي أنا عايزه الا واحد بس دكتور عبدالخالق لسة فاكره لحد النهاردة
فلاش باك
اسمعني يا دكتور انا عايزك تقول ل منال انها مبتخلفش وفرصتها في الحمل هتكون صعبة وليك مكافأة عندي على العمل العظيم دا
حضرتك بتهزر يا استاذ أمجد مدام منال دي اعرفها من زمان أوي ومستحيل اعمل معاها كدا سواء هي أو غيرها شرف المهنة يا استاذ ويكون في علمك انا هبلغ مدام منال باللي حصل دا
ابتسمت وبصيت في الأرض من رده فعله ونظرته المستفزة ليا وكأنه بيتحداني بس رديت عليه بعد دقيقتين بالظبط وقولتله
طب رد على تليفونك
تليفوني مبيرنش
قالها ب استهزاء وهو باصصلي بس مكنش يعرف ان تليفونه هيرن في نفس الثانية ساعتها نظرته اتغيرت واتحولت ل قلق ممزوج ب خوف
و رد على
التليفون
باااك
طب وانت عملت