رواية عائلة الصياد 30_1 بقلم منال عباس

لداخل الفيلا ...
صباح_ عمر بيه جه يا هانم
فريدة بتوعد _ يومه مش هيعدي
دلف فتى يافع العود ومشدود الجسد إلى داخل الفيلا وهو يحمل خلف ظهره حقيبة مدرسية ثم
عمر مبتسما _ هاي عليكو ناني صباح ازيك
فريدة بصوت غاضب _ ايه التأخير ده كله
عمر متذمرا _ تأخير ايه بس ما انا جاي في المعاد أهوو
فريدة_ جاي في المعاد ولا بتتسرمح مع أصحابك
عمر_ بتسرمح !! طب الباص اللي انا جاي فيه ده نظامه ايه فوتوشوب مثلا
فريدة وهي تزفر في ضيق _ يوووه أنا زهقت من عمايلك دي امتى تكبر وأرتاح من مسؤليتك
عمر في نفسه وبوجه ممتعض _ ياااااا ريت يا حاجة ده أنا أول واحد هرتاح وربنا يتوب علينا من تحقيق كل يوم ده
صباح_ يالا يا عمر بيه عشان تلحق تغير وتتغدى قبل ما المدرسين بتوعك يجوا
عمر_ اوك
فريدة بلهجة آمرة _ صباح جهزي الغدا عقبال ما اكلم البهوات اشوفهم جايين أمتى !! أه وماتنيش تكلمي المخدم يجبلنا شغالة جديدة بدل الغبية اللي جابها
صباح _ حاضر
هاتفت فريدة هانم زوجها وولديها لتعرف منهم متى سيعودون جميعا للمنزل و..
فريدة هاتفيا _ أيوه يا رأفت انت فين دلوقتي
رأفت هاتفيا بإيجاز _ في الطريق شوية وهاكون عندك
فريدة_ عظيم وخالد
رأفت_ جاي ورايا بعربيته
فريدة_ تمام أوي منتظراكم متتأخروش
رأفت _ بأمر الله مسافة السكة
ثم اتصلت بهاتف أدهم الذي لم يجب على اتصالها و...
فريدة هاتفيا بضيق _ مش بيرد ليه ده
أمسك أدهم بهاتفه المحمول ووجد أن المتصلة هي والدته و..
أدهم وهو يلوي فمه _ يوووه دي فريدة هانم اللي بتتصل
هيثم متسائلا بفضول _ مش هترد عليها
أدهم _ كبر منها هتقولي مش ناوي تيجي تاكل لأ معرفش وشوية حاجات هبلة كده
هيثم باستغراب _ دي أمك يا جدع
أدهم بتهكم _ يعني هي عشانها أمي يبقى أرد عليها
هيثم غامزا _ طبعا وبعدين دي ست يعني الصنف بتاعك اللي لا يمكن حد ينافسك فيه أبدااااا
أدهم _ عشان خاطر البؤين دول هكلمها
أدهم بصوت مرتفع للجميع _ يا شباااااب اسبقوني على المطعم وأنا هحصلكم
باسل _ اوكي
رزان_ تمام متتأخرش
ندى_ اووكي
طلب أدهم رقم والدته ليحدثها هاتفيا و....
أدهم هاتفيا بنبرة متحمسة _ ست الكل فيرووو هانم
فريدة هاتفيا بنبرة معاتبة _ أخيرا رديت عليا
أدهم بنبرة هادئة _ معلش يا حبيبة قلبي التليفون كان صامت وماكونتش سامعه
فريدة بضيق _ لأ مش مصدقاك
أدهم_ ليه بس ده انتي حبيبة قلبي وعقلي وحياتي كلها يا فيروو
فريدة_ ايوه ايوه اضحك عليا بكلامك ده
أدهم _ يا ماما وهو أنا أقدر برضوه أضحك عليكي
فريدة_ طب هاتيجي امتى عشان تتغدى
أدهم _ لأ أنا فاكس النهاردة
فريدة_ ايه الكلام الغريب ده نفسي أعرف بتجيبه منين
أدهم _ عادي يا ماما
فريدة متسائلة _ برضوه مقولتليش هاتيجي امتى
أدهم _ أنا هتغدى مع أصحابي بره
فريدة_ كل يوم غدا

بره يا أدهم نفسي مرة تتغدى معانا
أدهم_ معلش بقى يا فيروو وبعدين عاوزاني أجي عشان أسمع كلمتين بايخين من بابا ويقعد يأطم فيا عشان مرضتش أنزل الشغل معاه
فريدة_ محدش يقدر يا حبيبي يكلمك ولا يجبرك على حاجة انت مش عاوزها وبعدين طول ما أنا واقفة معاك ميهمكش من حد
أدهم_ قلبي يا فيروو
فريدة_ بس امل حسابك ترجع بدري النهاردة
أدهم _ ليه
فريدة_ خالتك ناهد جاية
أدهم_ اها .. كويس عشان أشوف جاسر بالمرة
فريدة بلؤم_ جاسر برضوه ولا شاهي
أدهم_ عيبك انك فهماني يا فيروووو
فريدة_ اه وأوعى تناديني قصادهم بفيروو فاهم !!!
أدهم_ أوامرك يا فيروو
فريدة_ برضوه
أدهم_ خلاص يا ماما هأقفل أنا عشان ألحق العيال المفاجيع لأحسن زمانتهم شطبوا على الأكل كله
أنهى أدهم المكالمة دون أن ينتظر أي رد من والدته ليلحق باصدقائه و...
فريدة_ ولد !!! مش هيعقل أبدا
عودة مرة أخرى للغردقة
في منزل الجدة نجاة
كانت السيدة نجاة تشعر بأنها ليست على ما يرام فصحتها دائما في تدهور مستمر تحاول أن تبدو أمام يارا بخير ولكنها تعلم في قرارة نفسها أنها ليست كما تدعي ...
نجاة متآلمة _ آآآه تعبانة يا نااااس مش قادرة من جسمي خالص .. أنا حاسة بنفسي ربنا يستر ويارا متحسش بيا أنا خاېفة عليها أوي لو حصلي حاجة مين هياخد باله منها بعدي ويراعيها أنا لازم أكلم رأفت مش هينفع أفضل ساكتة ومتكلمش سامحيني يا يارا أنا عارفة اني وعدتك اني مكلموش أبدا بس مش هاقدر أوفي بالوعد ده سامحيني .....!!!
Flash Back لما حدث قبل سنوات
نجاة _ يا بنتي استهدي بالله
يارا_ احنا مش بنشحت منه يا تيتة عشان يجي يرملنا قرشين ويمشي
نجاة_ ده عمك برضوه
يارا_ عمي اللي مقاطعنا ولولا اتصالك بيه وزنك ع دماغه كل شوية كان زمانه نسينا خالص
نجاة_ اعذريه يا بنتي هو عنده شغل وبعدين ماهو برضوه بياخد باله من فلوسك
يارا باستهزاء _ أها فلوسي !!!
نجاة_ أيوه ميراثك من أبوكي الله يرحمه مش كانوا شركا ولا نسيتي
يارا_ لأ مش فاكرة غير انه المفروض يبقى عمي وأنا مش عاوزة حاجة منه أنا كل اللي كنت عاوزاه منه انه يبقى عمي بجد ويحبني من قلبه
نجاة _ يعني أنا مش بحبك اخص عليكي
يارا_ لا والله أنا مقصدش يا تيتة بس أنا عمري ما حسيت بأنه عمي وحتى فلوسي اللي عنده مش عاوزاها
نجاة_ يا بنتي أما هتكبري ان شاء الله هتلاقي ميراثك كله موجود وزيادة وساعتها هتشكريه ع اللي عمله وانه حافظلك عليها وكبرها
يارا_ أشكره لما يكون واخد باله مني زي الفلوس بالظبط
نجاة_ اصبري يا حبيبتي وان شاء الله هتعرفي انه بيحبك هو هيجي كمان يومين وهثبتلك كلامي
يارا_ أها .. في المشمش
في فيلا رأفت الصياد
فريدة بضيق _ انت كل شوية هتفضل تروح لبنت أخوك
رأفت بنرفزة _ يعني عاوزاني أسيب البت ومسألش عنها
فريدة_ ده بدل ما تاخد بالك من عيلتك
رأفت_ الله مش ليها حق عليا
فريدة_ وحقنا احنا فين
رأفت_ ده انا بروحلها مرة كل شهر يا فريدة أومال لو كنت جبتها تعيش معانا هنا كنتي عملتي ايه
فريدة_ أهو ده اللي ناقص عاوز البت دي تربية نجاة تيجي تعيش معانا
رأفت بلهجة محذرة _ لاحظي ان اللي بتكلمي عنها تبقى بنت أخويا مش واحدة من الشارع
فريدة بنبرة هادرة _
أيوه وأمها مين مش هالة بنت نجاة !!! فاكر ولا نسيت
رأفت وهو يزفر في انزعاج _ يوووه رجعنا تاني لكلامك الفاضي ده
فريدة_ ده مش كلام فاضي دي حقيقة ولا خلاص نسيت نجاة كانت شغالة ايييه
رأفت_ لأ مش ناسي بس متنسيش انتي برضوه ان يارا بنت أخويا ليها ميراث أبوها الله يرحمه عندي وأنا ملزم بيه
فريدة بتهكم صريح _ ميراث ايه وزفت ايه ابوها ماټ وماكنش حيلته اي حاجة ده لولا تعبك انت وسهرك لليالي مكوناش وصلنا للمستوى ده
رأفت محذرا _ لأ عندك يا فريدة أخويا الله يرحمه كان شريكي ومش معنى انه ماټ يبقى هاكل حق بنته كله إلا الميراث ده حق ربنا !!!!!
فريدة بحدة _ خلاص ارميلها فلوسها وخلصنا
رأفت بجدية _ لأ مش هيحصل أخويا قبل ما ېموت وصاني أديها حقها لما تكبر وهي تتصرف فيه وأنا وعدته اني هعمل ده ومش هرجع في كلامي أبدااااااا
فريدة_ يبقى لما تتنيل تكبر يحلها ألف حلال لكن اياك تروح تاني عند نجاة أظن ده حقي وبعدين أنا مش عاوزة ولادي يعرفوا ان ليهم بنت عم عيلتها كانوا شغالين عند جدهم !!
رأفت بإنزعاج _ بلاش أفكارك الرجعية دي يا فريدة الكلام ده مالوش داعي
فريدة بحنق _ كله إلا ولادي ومصلحتهم أظن ان ده حقي !!
رأفت وهو يتمتم بتذمر _ طيب
فريدة بنبرة متجهمة _ انت حر تروحلها بس كل مدة مش عمال على بطال
رأفت بإقتضاب _ ربنا يسهل
فريدة بحدة _ أنا بقولك أهوو عاوز تديها حاجة يبقى تبعتهالها مع حد لكن مرواح عند نجاة لأ
رأفت بانزعاج _ يووه قولتلك ربنا يسهل
فريدة وهي تزفر في ضيق _ أوووف
فريدة في نفسها بوجه ممتعض _ مصدقت ان هالة ماټت وارتحت عشان تطلعلي بنتها حاجة تقرف..!!!!
الفصل الثاني
بعد مرور عدة أيام وتحديدا في الغردقة في منزل الجدة نجاة
نجاة لنفسها بخفوت_ ايه اللي أخره بس !! ده كان المفروض يجي النهاردة جيب العواقب سليمة يا رب
ثم رن هاتف الحاجة نجاة برقم رأفت و...
نجاة هاتفيا _ ايوه يا بني
رأفت_ ازيك يا حاجة نجاة
نجاة_ ازيك يا بني انت فين قلقتني عليك
رأفت _ معلش يا حاجة نجاة أنا مش هاقدر أجي بس هبعتلك الأمانة في البريد لأحسن مضطر أسافر
نجاة_ هه بتقول ايه ده ..ده أنا كان عندي أمل انك تيجي عشان تشوف يارا وتقعد معاها و...
رأفت مقاطعا_ مرة تانية يا حاجة نجاة هاجي من بدري وأقعد معاها
نجاة_ طيب يا بني اللي يريحك
رأفت_ تسلمي يا حاجة نجاة اشوفك ع خير
يارا_ ها يا تيتة قالك زي كل مرة صح !!!
نجاة بتردد_ آآآ.. آآآ
يارا_ خلاص يا نوجة مش محتاجة تقولي الجواب باين من عنوانه !
نجاة_ يا بنتي اعذريه هو عنده شغل برضوه وماتنسيش انه بيراعي مصالحك
يارا بحزن _ أها .. طيب
نجاة_ متزعليش يا بنتي هو وعدني انه هيجي
يارا_ خلاص يا تيتة مافيش فايدة أنا هعتبره زي اللي راحوا !!!!
نجاة_ لأ يا بنتي متقوليش كده
يارا وهي تبتعد _ أنا هاخش اكمل مذاكرة عن اذنك يا تيتة
دلفت يارا إلى داخل غرفتها والحزن يكسو وجهها فتأثرت الحاجة نجاة و..
نجاة_ لا حول ولا قوة إلا بالله ليه بس كده يا رأفت يا بني كسرت بخاطر البنت اليتيمة دي ربنا يهدي الحال ويقرب البعيد
واستمر الحال على وضعه لسنوات متتالية من زيارة واحدة يتيمة كل عدة أشهر من رأفت الصياد والتي لا تتجاوز العشرة دقائق وحينما فقط يكون لديه عمل ما قريب منهم فأصبحت صلة الرحم تقريبا شبه منقطعة حتى أنه عندما يأتي لزيارتهم يجلس مع الجدة نجاة فقط لأن يارا إما ترفض مقابلته أو تكون خارج المنزل في معهدها ...
عودة إلى الوقت الحالي
في منزل الجدة نجاة بالغردقة
نجاة_ سامحيني يا يارا أنا لازم اكلمه ..!!!
أخرجت الجدة نجاة هاتفها المحمول وطلبت رأفت الصياد لتبلغه بأمر هام و...
نجاة هاتفيا _ سلامو عليكو
رأفت هاتفيا وهو في طريقه للمنزل _ حاجة نجاة وعليكم السلام ازيك يا حاجة وأخبار صحتك ايه و...
نجاة مقاطعة_ صحتي مش تمام يا رأفت يا بني
رأفت_ ايييه يا حاجة مالك طمنيني
نجاة_ انا تعبانة يا بني
رأفت_ ألف سلامة عليكي يا حاجة في ايه
نجاة_ يا بني أنا مش هينفع أتكلم معاك في التليفون لازم أشوفك ضروري
رأفت_ بس آآآ... آآآ
نجاة_ معلش يا بني تعالى على نفسك اعتبرها أخر مرة تيجي تشوفني فيها
رأفت_ ح..حاضر هحاول أجي