اسكريبت حصري جديد بقلم المبدعة اسراء ابراهيم

انا قولتلك اتكلمي معاه وفهميه الحقيقة
ملك پغضب ورفض لا طبعا هو يشوفني زي ما هو عاوز انا مش مجبرة ابرر ليه حاجة ولو رجع بيا الزمن انا كنت ههرب تاني علي فكرة منا مش هعمل زيك واحط ايدي علي خدي واسكت وارضي بالامر الواقع
سكتت ملك لما خدت بالها من اللي قالته ووقتها روز بصت بعيد بحزن فمسكت ملك ايديها بندم وهي بتتكلم بلهفة حقك عليا يا روز ان اسفة والله مقصدش
روز بابتسامة باهتة ولا يهمك يا ملك انا عذراكي وعارفة ان عندك حق انا يمكن سكت ووافقت اتجوز اخوكي اللي بيهيني كل دقيقة بس تفتكري حتي لو كنت اتكلمت كان حد هيصدقني كلمة امك قصاد كلمتي يعني مكنش حد هيصدقني يمكن لو كان يوسف هنا وقتها انا متأكدة انه كان هيصدقني ويقف معايا لكن للاسف كنت لوحدي يا ملك كنت واقفة ساكتة لمرات عمي اللي قالت عني اني اعرف حد واني ههرب معاه وكل ده عشان حاولت ادافع عنك وامنع جوازك من الشخص اللي هي كانت عاوزة تجوزهولك وقتها مقدرتش اتكلم وسكت كان عندي امل لما امي طلبت من اخوكي يتجوزني انه يطلع راجل بجد ويحميني لكن للاسف كان تأثير امك قوي عليه لدرجة انه بياخد كلامها ويعمل بيه تفتكري كنت هقدر اقف قصادهم
ملك مسحت دموع روز بايديها وكانت صعبانة عليها اوي فردت بحزن حقك عليا متزعليش والله انا غلطانة اني اتكلمت انا عارفة انك مكنتيش هتقدري تعملي حاجة بس هنعمل ايه للاسف ماما كل همها الفيلا والفلوس ومرات عمي كل همها ازاي تمنع امي من السيطرة علي كل ده واحنا في النص
روز بلهفة يا نهاري يا ملك اخوكي زمانه ولو جه ملقاش الاكل هيطين عيشتي سيبيني اخلص اطلعي انتي يلا انتي لسة عروسة
ملك بسخرية عروسة ايه والنبي اسكتي يلا خلينا نلحق نخلص مع بعض اهو نهون علي بعض شوية
عالغدا كانو قاعدين كلهم عالسفرة ما عدا فارس اللي مجاش لانه قال انه هيتأخر فكانت ملك بتلعب في الاكل ومش بتاكل ويوسف كان واخد باله لكنه معلقش اما روز فكانت سرحانة هي كمان في حياتها اللي لو كانت من غير فارس كانت هتبقي عاملة ازاي فبصت لمرات عمها پغضب لانها السبب في كل ده
جميلة ببرود مش بتاكلي ليه يا ملك
ملك بنفس البرود ايه هتحكمي علي يوسف يأكلني ڠصب عني كمان ولا ايه
يوسف قبض علي ايديه پغضب وقام من مكانه وقرب من ملك وسحبها من ايديها وراه علي فوق من غير ما يتكلم وكانت في نفس الوقت متابعاها روز بقلق
ماجدة بقصد وهي بتبص لجميلة يلا اهي تتربي عشان تعرف تتكلم عن جوزها بأدب
جميلة كانت متغاظة لكنها مقدرتش ترد وبعدين قاطعهم فارس اللي دخل من الباب
فارس بجدية سلام عليكم ماما انا معايا ضيوف ياريت حد يضايفهم علي ما اخد شاور وانزل
جميلة بضيق وانت بتقولي انا ليه ما مراتك قاعدة اهي يعني هقوم اخدمهم انا مثلا
فارس بجدية لا طبعا العفو روحي يا روز شوفيهم يشربو ايه يلا اتحركي
روز بهدوء حاضر بس هلبس الطرحة بتاعتي واطلع ليهم
فارس بلا مبالاه تمام يلا انجزي
ماجدة پصدمة يعني انت هتخلي مراتك تخدم علي صحابك الرجالة يا فارس
فارس بضيق ده مش غريب يا مرات عمي ده معاذ صاحبي وشرين بنت عمه كانو قريبين من هنا فعزمتهم يشربو حاجة مش حوار يعني
ماجدة بسخرية لا فعلا مش حوار عليه