رواية جديدة وتين وعمير

حصل اللي حصل وهو بص لي بدهشة كدا.. الواد مصډوم يا عيني..
_ايه
_احم.. شبشب حمام أو شبشب منال وكدا.. هاخده منها النهاردة وأبقى أرجعه لها.
يا لهوي.. بيضحك تاني يا ابني امسك نفسك بقى متخلينيش أهزقك!
المهم سابني ونزل لدقايق وجه بعد شوية بحاجة في ايديه..
_جبته
كان متوتر وهو بيبص بإحراج.. ايه يا مهندس يا مغرور دلوقتي محرج عملت مصېبة ولا ايه
_ا.. اه جبته.. اتفضلي يا آنسة وتين.
_شبشب بصباع وعليه أرنب أخضر ودانه مقطوعة
المرة دي كان دوري إني أضحك الشبشب كبير وشكله بيضحك ومش هييجي على مقاسي بس ايه يعني أحسن ما أمشي حافية.
_اللي لقيته بقى معلش.
_شكرا يا أستاذ عمير.. أنا آسفة تعبتك معايا.
كانت أول مرة عيني تيجي في عينه مباشرة لون عيونه بني فاتح أول مرة ألاحظ.. أنا عيوني كان لونها أخضر.. بس مش أوي.. ساعات لونها بيتحول على حسب احنا بالليل ولا الصبح.. ولاحظت أنه كان بيبص أوي بس في لحظة ما فضل يستغفر وبعد كدا قال لي بالحرف
_طب يلا يا آنسة وتين.. اتفضلي من سلم السيدات وأنا همر على الشباب.. لعلمك منال موجودة في البيت وعاوزاك هي اللي عطتني الشبشب.
الخبيثة منال.. تلاقيها عطته الشبشب الكبير اللي بيطرقع طول ما أنا ماشية دا علشان تشمت في.. آدي آخرة إن صاحبتي تتعود علي.. مصېبة من مصايب الزمن!
عدى الوقت ورحت لها البيت لقيتها مظبطة قاعدة شاي وبسكوت وفيلم نسمعه.. الفيلم كان ليه علاقة بشهر رمضان.. آه فعلا! دا رمضان بعد كام يوم!!!
قعدنا مع بعض وشربنا الشاي..
_يعني متأكدة مفيش حد في البيت أقعد براحتي
_يا بنتي أحلف لك يعني ماما عند خالتو مقضينها نم على جيراننا وأختي متجوزة وأخويا أنت لسة سايباه في الدار!
_حلو كدا.. الدار أمان.. أقلع طرحتي بقى.
وبالفعل خلعت الطرحة.. الجو كان حر واليوم كان متعب.. من جامعة لحفظ وأخيرا قعدة راحة مع منال صديقتي المفضلة.. والوحيدة.
كانت هي قاعدة ببيجامتها وقاعدين نسمع الفيلم في أوضة الضيوف كانوا حاطين شاشة كبيرة والمكان أريح من أي حتة خاصة إن فيه تكييف..
سمعنا صوت تكة المفتاح في الباب.. مين اللي جه معقولة يكون مامتها بس لا.. دي قالت لي هتقضي اليوم هناك.. يبقى أكيد عمير..!!
فضلت أجري في كل مكان على أساس ألاقي طرحتي بس أنا سبتها برة..
_يا لهوي يا لهوي هيشوفني يا منال الحقيني!
التانية حدفت لي خمار وقالت
_خدي خمار ماما أهو استري بيه نفسك.
هي ليه محسساني إننا في شقة مفروشة واتقفشنا ايه استري نفسك دي
المهم التاني دخل البيت وقعد على الركنة في الصالة وحط رجل على رجل ورقد كدا وبيقول
_منال حضري لي غدا علشان ورايا مشوار مهم.
منال خرجت له وضړبته في كتفه ولسة بتكلمه فقام كان هيضربها بهزار على اللي عملته بس شافني فاتجمد..
هو شافني فاتجمد..
كنت لابسة خمار أمه وهو بعد عينه بسرعة عني وقال
_آ.. آسف.. معرفش إنك لسة هنا.. أنا هأطلع برة علشان تاخدوا راحتكوا.
ساعتها وقفته بسرعة وأنا بقول
_لا لا.. أنا أساسا كنت بدور على طرحتي وماشية اتفضل أنت علشان تتغدى وتروح مشوارك.. أكيد مهم.
كنت متوترة فرميت أي كلمتين وأنا بدور على الطرحة لحد ما لقيتها فدخلت أوضة الضيوف ألبسها بسرعة قصوى وهو دخل أوضته وقفل على نفسه علشان ميزعجنيش.
كنت حاسة بتوتر وودعت منال واستأذنت ومشيت عدت أيام كتير ولقيت ماما جت تكلمني وتفاتحني في موضوع أدركت إنه موضوع العريس إياه اللي كانت بتقول عليه بقى لها ييجي شهر..
وآخرة ما زهقت قلت لها
_يا ماما