حـدود العشـم بقلم منــال عـلـي

مروان زمانه أكله واتهنى.. هاتهولي بقى طالما لسه ناي أصله وحش طارق أوي.
سماح وشها جاب ألوان وبدأت تبرطم بكلام مش مفهوم أصل.. أصل مروان جاله مغص ومحبش يآكله.. كنت لسه هكلمك أقولك تعالي خديه. ضحكت ضحكة صفرا وقلت لها ولا يهمك يا حبيبتي بس بما إني هنا بقى.. قوليلي إيه كيس المانجا المتخزن ورا ده
سماح كانت فاكرة إن الموضوع خلص عند علبة بفتيك بس هي متعرفش إن نادية اللي كانت بتسكت خلاص ماټت! مديت إيدي وجبت كيس المانجا وطلعت علبة سمنة بلدي كانت لسه فاتحاها وقلت لها بكل بساطة تعرفي يا سماح طارق كان لسه بيقولي نفسه في عصير مانجا والسمنة اللي عندي خلصت.. هخدهم منك وأهو نوفر مشوار السوبر ماركت وإحنا إخوات والبيت واحد.. ولا إيه
سماح قعدت على الكرسي وهي حاسة إن ضغطها بيعلى.. مش قادرة تعترض لأنها هي اللي بدأت قاعدة التلاجة المفتوحة. خرجت من بيتها وأنا شايلة حاجتي وحاجتها كمان ورجعت البيت استقبلت طارق بابتسامة نصر. طارق استغرب إيه المانجا والسمنة دي يا نادية إنتي اتسوقتي قلت له ببرود لأ يا حبيبي.. دي أختك سماح كانت معدية من تحت بيتها فقلت أطلع أسلم وآخد واجبي!
طبعا سماح مسكتش.. بالليل لقيت تليفون طارق بيرن وصوت سماح جاي من السماعة وهي بټعيط ومڼهارة شوفت يا طارق! مراتك دخلت بيتي وهجمت على تلاجتي وخدت خزين البيت كله.. دي أهانتني في بيتي يا طارق! طارق بصلي وهو مستغرب وأنا كنت قاعدة بكل هدوء بشرب كوباية الشاي بالمرامية بتاعتي. خدت منه التليفون وقلت لها بكل ثقة يا سماح يا حبيبتي أنا عملت زي ما بتعملي بالظبط.. مش إنتي اللي قولتي رجلك على رجل نادية أنا كمان رجلي خدتني لعندك.. ولا هو حلال ليكي وحرام عليا
هنا طارق فهم اللعبة.. وبدل ما يزعقلي لقيته بيقول لها والله يا سماح نادية عندها حق.. البيت بيتك وبيتها وزي ما بتدخلي مطبخها هي كمان تدخل مطبخك.. ولا إنتي شايفة غير كدة
سماح قفلت السكة وهي بتشيط ومن يومها مابقتش تيجي تعدي من تحت البيت غير بميعاد ولما بتدخل الشقة بتفضل قاعدة على الكنبة مؤدبة وإيدها في جنبها.
بعد مكالمة طارق سماح اختفت أسبوع كامل.. لا تليفون ولا أنا معدية بالصدفة. قولت في سري يا فرج الله أخيرا الواحد هياخد نفسه في بيته!. لكن فجأة لقيت جرس الباب بيرن الساعة 10 بالليل.. فتحت لقيت حماتي واقفة وعلى وشها ڠضب يهد جبال! إيه يا نادية بقى بتفتشي في تلاجة أخت جوزك وتعيريها بلقمتها ده إنتي اللي واكلة خيرنا كله! دخلت حماتي المطبخ تفتش هي كمان ردا للي عملته في بنتها.. بس اللي شافته حماتي جوه التلاجة خلى عينيها تطلع من مكانها!
حماتي فتحت
التلاجة وهي ناوية تطلع القطط الفطسانة بس لقت تلاجتي فاضية حرفيا! مفيش غير إزازة مية وعلبة زبادي واحدة. بصيت لها بدموع تمثيل طبعا وقلت لها شوفتي يا ماما سماح جت خدت البفتيك والجبنة والفاكهة وراحت بيهم لبيتها.. وأنا من ساعتها مش لاقية آكل عشان الفلوس خلصت لآخر الشهر! هي اللي بتاكل خيري مش أنا! حماتي اټصدمت وبدأت تبرطم يا مصېبتي! بقى سماح تعمل كدة ده هي قالت لي إنك خدتي خزين بيتها كله!
طلعت الموبايل ووريت حماتي فيديو كنت مصوراه بالموبايل من غير ما سماح تحس وهي بتفتح التلاجة وبتدوق الجبنة وبتاخد علبة البفتيك وبتقول هوفره عليكي. حماتي وشها جاب ألوان.. وقالت بصوت واطي دي سماح دي طلعت داهية! طب والله لأربيها هي وجوزها اللي سايبها تلم من بيوت الناس كدة. واتفقت أنا وحماتي على خطة نخلي سماح تعترف بكل حاجة قدام طارق وجوزها عصام.
عزمنا سماح وجوزها عند حماتي.. وطبعا سماح جاية وهي رافعة مناخيرها في السما وفاكرة إن حماتي في صفها. وعلى السفرة حماتي قالت بصوت عالي يا جماعة بمناسبة إننا كلنا متجمعين.. نادية وسماح قرروا يبدلوا تلاجاتهم كل أسبوع عشان سماح شايفة إن تلاجة نادية طعمها أحلى! جوز سماح عصام بلم وقال يعني إيه يا حماتي هنا طلعت علبة البفتيك اللي كنت استردتها منها وحطيتها في نص السفرة وقلت يعني البفتيك ده لفه المحروسة سماح وراح ورجع وفي الآخر محدش أكله.. تحبي تحكيلهم يا سماح قصته ولا أحكي أنا