فات اوان الندم

شيطانه رسمي يا أمي.
وأنا بعمل كل ده ليه مش عشان تبقى إنت اللي ماسك الدنيا في إيدك، والكل يبقى تحت رجليك .
ما تقلقيش أنا هعرف أكسب ثقته، وكل التجار هيبقوا حواليا.
بالظبط وأنا هفضل وراك خطوة بخطوة، لحد ما حسين نفسه يكتبلك كل حاجه
طيب منصور هيسكت ؟!
لأ منصور مش هيسكت وده اللى أنا عايزاه وكل ما منصور يعادى أبوه اكتر تقرب أنت أكتر وأكتر هو يتحرم من ولاده وانت تعوضه
بس أنا مش قادر أحبه
مش لازم تحبه حب فلوسه ومتنساش إن لولا حسين مكناش هنلاقى ناكل
حاضر هعمل زى ما قولتيلى
بعد فتره بسيطه دخل حسين البيت وحدف نفسه على الكرسى بإرهاق
قربت منه مشيره وبدأت تدلك كتفه بنعومه
مالك يا حبيبي شكلك تعبان
كان فى شويه مشاكل مع التجار عايزين فلوسهم والبضاعه لسه مخلصتش من المخزن اديتلهم جزء و هقسطلهم الباقى لما ابيعها
بإذن الله هتبعيها هما عرفوا إن منصور سابك عشان كده عايزين يطمنوا
لأ لسه محدش عرف حاجه وبعدين هو أسبوع بالكتير وهيرجع تانى
اتدخل فاروق فى الكلام
من هنا لحد ما منصور يرجع اعتبرنى ابنك واعتمد عليا وماتقلقش من التجار أنا هتكلم معاهم واتابعهم بنفسى انت عارف يا عمى أنا بعتبرك بابا حتى لو انت لسه مش معتبرنى إبنك بس انا وعيت على الدنيا لقيتك أبويا
يا فاروق أنت غالى أوى عندى انت أغلى عندى من عيالى انت واخوك كفايه إنك ابن مشيره انا ربيتك وقعدت معاكوا اكتر ما قعدت مع عيالى
شاورت مشيره لابنها إنه يمشى عشان تقدر تتكلم معاه
اقترب فاروق من حسين وقبله على راسه
ربنا مايحرمنى منك يا بابا أبدا انا همشى دلوقتي هقعد على القهوه مع صحابى
خرج فاروق وساب حسين مع مشيره
قربت مشيره و قعدت على رجل حسين ، وبصّت له بنظره كلها دلع وقالت
شوفت فاروق بيحبك إزاى
حسين شدها عليه وهو بيضحك بخفة
فاروق بس اللى بيحبنى ؟.
هي قربت وشها منه وقالت بصوت واطي
لأ انا كمان بحبك وعايزاك تورينى بقى إنت بتحبني قد إيه ولا الكلام الحلو خلاص وبس؟
ضحك وقال
وأنتى عايزانى اوريكى ازاى وبعدها بص للاوضه .
لأ مش اللى فى دماغك انا عايزه غوشتين حلوين كده البسهم بقالك كتير ماجبتليش حاجه حلوه البسها
باسها حسين من دراعها وغمزلها
عيونى بس
عايزك تدلعينى
بس كده أنت تؤمر
مر اليوم وفى اليوم التالى راح منصور عشان يقابل
المعلم عبد الظاهر
قابله المعلم عبد الظاهر بترحيب
ازيك يا منصور عامل ايه يا ابنى
أهلا يا معلم عبد الظاهر معلش لو جيت من غير معاد
ولا يهمك يا حبيبي بس اكيد مجيتك دى وراها حاجه
أه بصراحه جايلك فى حاجتين أول حاجة شغل بصراحه أنا سبت الشغل عند أبويا وقررت افتح مركز توزيع لحسابى وهكون محتاج كميات كبيره من البضاعه وماتقلقش هدفعلك مقدم قبل أى تعامل بينا
أنا مش قلقان يا منصور منك بالعكس ادخل خد اللى انت عايزه والمخازن عندى مليانه
ده العشم يا معلم برضو وليا طلب تانى
قول سامعك
المفروض إنى كنت متفق معاك على محل ابويا اننا هنستلم نص البضاعه والنص التانى هنبدله بأدوات سباكه جديده عشان دى مابقاش فى طلب عليها زى الاول والناس بقت تطلب حاجات جديده ارخص وجودتها أعلى وانت كتر خيرك رضيت تبدلها من غير مانرجع للعقد صح
أه وأنا عند كلمتى
معلش يا معلم هنرجع فى الاتفاق ده وخليه ياخد البضاعه القديمه دى كلها حلال عليه
بس كده مش هتتباع وهتتركن عنده فى المخزن
معلش يا معلم البضاعه الجديدة أنا هاخدها فى المخزن عندى وهاخد كمان كميه من القديمه
هو حصل حاجه