رواية وصية صفية بقلم الكاتبة منال ام ابراهيم مرجان

كويس اني بنت خالك مش واحدة من البنات اللي تعرفهم
اسرع ادهم ينفي تلك الإتهامات عنه قائلا
صدقيني يا نورا انتي فاهمة غلط الحمد لله ربنا تاب عليا من موضوع البنات ده خالص
اتمنى إني اكون فعلا فاهمة غلط نصيحة مني يا ادهم انت حتتسأل ادام ربنا عن شبابك ضيعته فإيه حتقدر تقف ادام ربنا وتقول انك ضيعته في الجري ورا بنات الناس والضحك عليهم ياريت تفوق لنفسك وتفكر فكلامي ده كويس
ادهم بضيق حاضر يا نورا حافكر عن إذنك
ابتعد ادهم تاركا نورا ليقترب من حيث تجلس نادية التي خرجت إلى الحديقة لتتمشى قليلا فيها جلس بجوارها وظلا معا يتبادلان الحديث والمزاح وقد علت ضحكاتهما الأمر الذي أثار حفيظة علي الذي كان خارجا إلى الحديقة في نفس التوقيت فشعر بالغيرة تنهش قلبه وود لو أنه ذهب إلى نادية وجذبها من ذراعها صارخا فيها أن تكف عن فعل كل ما يضايقه ولكن كيف له ذلك وليس هناك ثمة سلطان له عليها لذلك فقد عزم على مفاتحة عمه في أمر إرتباطه بنادية أثناء حفلة عيد ميلادها يوم الخميس القادم على أن يعلن للجميع أمر إرتباطه بها أثناء الحفل
كانت ألفت تتابع الموقف من بعيد حين شاهدت ادهم وهو يبتعد عن نورا ويجلس بجانب نادية فاقتربت منهما قائلة
ادهم لوسمحت يا حبيبي تعالي عايزاك دقيقة
حاضر يا ماما دقيقة واحدة يا نادية حاشوف بس ماما عايزة إيه وراجعلك تاني نكمل كلامنا
وقفت نادية هي الأخري وقالت
براحتك بقى يا ادهم أنا طالعة عشان عايزة بابا فموضوع حاروح الحقه قبل ما ينام ونبقى نكمل كلامنا بعدين
خلاص يا قمر تصبحي على خير انتي
وانت من أهله يا ادهم
دخل ادهم مع والدته إلى غرفتها واغلق الباب خلفه ثم جلس قائلا
خير يا ماما كنتي عايزة حاجة
جلست ألفت إلى جواره قائلة بحيرة
ماتفهمني يا ابني الأول روحت وقفت مع نورا وشوفتك بتديها ورد بعد شوية روحت قعدت جنب نادية وعمال تضحك وتهزر معاها ماترسيني على بر انت ناوي على مين فيهم بالظبط?
بقولك إيه يا ألفت انتي تصرفي نظر عن الموضوع ده وتشيليه من دماغك خالص
ليه بقى إن شاءالله?
أنا قلتلك قبل كده ان نادية دي مش سكتي أنا ما اتجوزش واحدة بتضحك وتهزر مع أي شاب كده عادي حتى لو كان الشاب ده ابن عمتها مالو كده كنت اتجوزت البت صافي بدل ماهي حتموت عليا كده أما بالنسبة لنورا بقى فدي طلعت نسخة من احمد ابنك يعني تجوزيهم لبعض وانتي مغمضة وقبل كل ده أنا ماقدرش اشيل ذنب نص بنات دمياط اللي حينتحروا لما يعرفوا ان ادهم فاضل اتجوز
ألفت بتهكم وحياة أمك قولي بس عملتلك إيه نورا?
دي طلعت خنقة بقى فيه بنت تقول للورد لأ دي البت صافي لو جبتلها حزمة فجل كان زمانها عماله تشم فيها شهر بحاله ومش بعيد ټموت من الفرحة اساسا امال لو كانت سمعت الكلمتين اللي كنت محضرهملها كانت أقامت عليا الحد
هو انت يا أخويا كنت مفكرها زي البنات الكسر اللي تعرفهم وبعدين يعني انت عايز تفهمني ان ادهم فاضل اللي مدوب نص بنات دمياط تقف معاه بنت خام وعلى نياتها زي نورا
لم يجيبها ادهم ولكنه أشار إليها أن تقترب ثم قال بجدية
بقولك إيه يا ألفت تعالي كده عايز أقولك على حاجة تعالي ما تخافيش أنا بس عايز افهمك على حاجة انتي برضه زي أمي
اقتربت منه ألفت التي بدا عليها الإهتمام فقام ادهم ولف ذراعه حول كتفبها ومال على أذنها قائلا
عادة يعني في الحالات اللي زي دي بس ده مع الأمهات الطبيعيين العاديين يعني لما الأم بتعرف ان ابنها مصاحب بنات وبيسرح بيهم ده في الأمهات الطبيعيين زي ماقلتلك بتقوله عيب عليك يا ابني وحرام عليك بنات الناس مش لعبة وحاجات زي كده يعني ولا انتي رأيك إيه?
رفعت ألفت رأسها وابتسمت قائلة
يوه جتك إيه يا ادهم ياواد أنا عارفة ان ده كله طيش شباب وبكرة ان شاءالله لما تتجوز حتعقل وربنا يهديك ثم سرعان ما تحولت ملامحها إلى الجدية وهي تقول
بس تعالى هنا يا أخويا لما انت عارف الكلام ده بتضحك على بنات الناس ليه?
أجابها ادهم قائلا بجدية
صدقيني أنا نفسي ابطل الحكاية دي بس مش قادر ادعيلي ربنا يهديني ثم نظر ألى الفراغ أمامه قائلا
عشان لما ربنا يسألني اعرف أجاوب
انتهى اليوم بكل أحداثه وصعد الجميع إلى غرفهم للنوم بعد أن غادرت أمنية مع شريف ودخلت كل من لبنى ولمياء مع سمية غرفتها
لبنى نسيبك احنا بقى عشان تنامي يا ماما
سمية ومين حيجيله نوم يا بنتي الليلةدي
لمياء معاكي حق يا ماما كان يوم مشحون فعلا بس قوليلي يا ماما انتي كنتي تعرفي ان الشقة اللي تحت بإسم عمتو ألفت?
سمية لا يا حبيبتي أنا اللي كنت أعرفه ان عمتك ألفت باعت نصيبها في البيت من زمان بعد مۏت جدك والأزمة اللي حصلت لكن عمك صفوت لما ربنا كرمه رجع اشتراه تاني وشقتنا دي أنا صممت اتنازل عنها لعمك بعد ماجابلنا الشقة بتاعتنا في القاهرة وهو كتر خيره بيسيبنا نقعد فيها لما نيجي دمياط ومن بعد احمد ما خلصت الكلية بتاعته وعمك مسكه الشغل بتاعه عمتك باعت البيت بتاع عمك فاضل وجت عاشت هنا مع ولادها عشان البيت التاني كان بعيد اوي عن المعرضين بتوع عمك لكن من الواضح انهم دفعوا لخالك تمن الشقة
لبنى هو انتي مش حتكمليلنا الحكاية ولا إيه إيه حكاية الأزمة دي كمان
بقولكوا إيه أنا عايزة أنام دلوقتي وبعدين نورا مش هنا بس ما تتصوروش يا بنات احمد كبر ازاي فنظري بعد اللي عمله النهاردة مع أمه ربنا يحميه لشبابه
لبنى بأسى يارب يا ماما
سمية بإنفعال وعلى اد ما احمد كبر فنظري على اد ماكان نفسي أخد نادية بنت عمكوا قلمين على وشها بعد الفصول البايخة اللي عملتها النهاردة الأول مع أميرة وبعدين مع جمال وألفت أنا نفسي افهم بس فيها إيه علي ابني شايفه واحنا مش شايفينه
لبنى طب اقولك على حاجة حتفرحك نادية شكلها كده بتحب واحد زميلها فالكلية شوفتها واقفة معاه وشكلهم مش شكل زملا ابدا
سمية بفرحة بجد يا لبنى يا الف نهار ابيض
لمياء ماتتعشموش اوي كده على قال لو ما اتجوزش نادية برضه مش حيتجوز نورا
سمية بغيظ قومي من هنا يابت انتي
طيب اقولك على حاجة كمان مش يمكن رفض علي لنورا ده سببه اننا بنضغط عليه وانتي عارفه إنه عنيد زي عمه تيجي نبطل نكلمه فالموضوع ده خالص وكأنه مابقاش فارق معانا ونسيبه على راحته ونشوف رد فعله بعدها يمكن ربنا يهديه وينسى موضوع نادية ده خالص
سمية بلهفة فكرك كده يا لبنى
آهو نجرب مش حنخسر حاجة
وماله نجرب لما نشوف أخرتها إيه
وفي القاهرة وتحديدا داخل أحد الأماكن التي يطلق عليها اسم الديسكو حيث شباب وفتيات يتمايلون على أنغام الموسيقى الصاخبة دون رادع من دين أو خلق أو ضمير حيث جلس سامح بصحبة صديقه تامر الذي كان يحدثه قائلا
معقول يا برنس اللي بتقوله ده بقى سامح الحسيني حيخطب ويتجوز هيا الدنيا جرى فيها إيه
افرغ سامح الكأس الذي يحمله في جوفه دفعة واحدة ثم قال ساخرا
انت اهبل يا ابني انت هما كل اللي بيتخطبوا بيتجوزوا
طب ماترسيني على الدور يا
برنس
شوف هيا مش راضية تديني الأمان وبتقول إني باضحك عليها والنهاردة اديتهملي فالتليفون أنا بقى حاروح لأبوها يوم عيد ميلادها الخميس الجاي أقوله أنا جاي اطلب إيد نادية وبعد مايعدوا الكام شهر اللي فاضلين فالدراسة حاجيب أبويا ونطلبها رسمي ربط كلام بس يعني وبكده تتأكد إني مش بلعب بيها وأنا ناوي اخلص كل حاجة في رحلة شرم الشيخ عشان أنا بصراحة زهقت من تمثيل دور العاشق الولهان وبقالي مدة بازرع وخلاص زرعت وآن أوان الحصاد لا ومش أي حصاد دي نادية صفوت بجلالة قدرها ياما نفسي اشوف مناخيرها اللي حطاها فالسما دي وهيا بتتمرمغ فسابع ارض
بس حرام يا برنس الحق يتقال البت بتحبك ومناخيرها اللي رفعاها دي مش بتنزلها غير عشانك انت بس إيه التخطيط الجامد اللي على كبير ده
امال يا ابني احنا بنلعب امال أنا صممت انها تطلع رحلة شرم الشيخ وأنا حاطلعها معاها ليه انت عارف ان عندنا شاليه هناك يعني فأي وقت عايز اروح باروح وهو ده اللي حيشهد اللحظة التاريخية يظهر ان المرحومة أمي كانت بتدعيلي بضمير اوي الله يرحمها
رواية وصية صفية
بقلم الكاتبة منال أم ابراهيم مرجان
الفصل السادس
ما إن دلفا معا إلي داخل المنزل حتى ألقى قذائفه من جديد يصر دوما في الأونة الأخيرة أن يحول المنزل إلى ساحة للمعركة صړخ في زوجته قائلا
أنا عايز اعرف قولتي إيه عني لأخوكي خلاه يكلمني بالطريقة دي أنا يقولي الزم حدودك
أجابته قائلة بتهكم
أنا ماقلتش حاجة وبعدين هو فيه حاجة اصلا عشان أقولها?
ازدرد لعابه ثم قال بإرتباك
لا طبعا مافيش حيكون فيه إيه يعني
أجابت قائلة بشك
ولما هو مافيش عمال تزعق ليه وصوتك العالي ده ممكن يصحي البنت
أشاح بيده قائلا في إعتراض
انتي حتحاكميني ولا إيه? أنا ازعق فبيتي براحتي زي ما أنا عايز ماحدش شريكي
زفرت أميرة بشدة ثم قالت بحنق
اسمع يا جمال انت مش ملاحظ انك من يوم ما اتعرفت على صاحبك اللي اسمه فتحي ده وانت حالك اتشقلب واتغيرت 360 درجة مش انت ابدا جمال اللي حبيته واتجوزته وكان عندي إستعداد اديله عمري كله بس يفضل يحبني إيه اللي غيرك كده يا جمال عملك إيه فتحي ده عشان تتغير بالشكل ده?
بقولك إيه انتي عايزة تعلقي غلطتك على شماعة فتحي قبل ما تسأليني اتغيرت ليه اسألي نفسك الأول انتي اتغيرتي ليه من ساعة ما خلفنا البنت وأنا مش لاقيكي ولا انتي بقيتي بتسألي فيا كل ما احتاجك تقوليلي اصلي برضع روضة اصلي بغير لروضة اصل روضة تعبانة مش عارف لو خلفنا عيلين كمان ولا تلاته حتعملي إيه? ثم تعالي هنا قوليلي إيه اللي أنا بعمله مش عاجب حضرتك?
أولا أنت عارف كويس إني عمري ما اهملتك ولا اهملت فنفسي ولو حصل بيبقى ڠصب عني ثانيا عايز تعرف إيه اللي بتعمله مش عاجبني ابسط حاجة البنات اللي انت ضايفهم عندك ع الفيس دول تقدر تقولي بتكلمهم ليه
دول طالبات عندي في المدرسة والدروس وبيسألوني على حاجات في المنهج
بس المحادثات اللي بينكم مش بتقول كده يا جمال
هيا حصلت تتجسسي عليا يا أميرة
ده غير الشكاوى اللي بتيجي من الطالبات في المدرسة وأبلة الناظرة كتر خيرها طلبتني واتكلمت معايا بشكل ودي في موضوع الشكاوى دي
الشكاوى دي كلها كيدية والبنات دول كلهم كدابيين تلاقيهم كانوا عايزين ياخدوا درس عندي وأنا رفضت
ماشي يا جمال أنا حاعمل نفسي مصدقاك بس يا ريت ما تنساش ان عندك بنت وممكن اللي بتعمله مع بنات الناس يتردلك فيها وياريت تراجع نفسك تاني وتبعد عن البني ادم اللي اسمه فتحي ده بدال ماتلاقي نفسك خسړت كل حاجة
جمال بتهكم ماشي يا ميس أميرة منكم نستفيد
أشرقت شمس اليوم التالي على منزل حامد الدمياطي بمن فيه استيقظ الجميع وتناولوا إفطارهم واستعد وا للمغادرة وبعد قليل كانوا يقفون في حديقة الفيلا إستعدادا لركوب سياراتهم والإنطلاق إلى القاهرة انتهى الجميع من السلام على بعضهم البعض وقام صفوت بدعوتهم جميعا لحفل عيدميلاد نادية الخميس المقبل وبالطبع وجدتها ألفت فرصة سانحة لكي يذهب ادهم ويعيد الكرة مع نورا مرة أخرى فيما اعتذر أحمد عن الذهاب لرفضه حضور مثل هذه المناسبات واخيرا الټفت صفوت إلى علي قائلا
يلا بينا يا علي اعمل حسابك توصل والدتك وإخواتك وتحصلني على الشركة ورانا شغل كتير
علي بإذعان تحت أمر حضرتك يا عمي
ثم الټفت إلي نورا قائلا
اعملي حسابك تأخدي أختك معاكي فعربيتك عشان أنا حاطلع على الشركة علطول
حاضر يا بابا
اقتربت منها نادية قائلة
بس اعملي حسابك أنا اللي حاسوق
بس على شرط تسوقي بالراحة وتبطلي سواقتك المچنونة دي
يا بنتي انتي حتفضلي جبانة كده طول عمرك اكبري بقى
لا يا ستي مين قالك إني عايزة اكبر أنا مرتاحة كده
صفوت يلا بينا مش حنضيع الوقت فلعب العيال ده
وبالفعل ركب الجميع سياراتهم وانطلقوا في طريقهم إلى القاهرة
عادت نورا إلى منزل عمها بعد أن قامت بتوصيل نادية إلى المنزل لتستكمل لها سمية مابدأته كما اتفقت معها وهم يغادرون دمياط جلست مع لبنى ونورا أمام سمية التي كانت تبتسم وهي تقول متعجبة من إلحاح نورا
انتي محسساني إني باحكيلك حدوتة قبل النوم كده ليه ?
عشان خاطري بقى يا خالتو كملي أنا عايزة اعرف جدي حصله إيه هو وعمي عزت وليه سيبنا دمياط وجينا هنا مع إن أنا عن نفسي بحب دمياط اكتر
حاضر يا حبيبتي حاكملك شوفي يا ستي عمك عزت الله يرحمه قالي ان صبحي لما جدك طرده من الشغل وهو ماشي عزت سمعه وهو بيدعي عليه إن ربنا يحرمه من ماله اللي مستقوي بيه على خلق الله وده اللي حصل فعلا وكان السبب في مۏت جدك جدك قبل ما ېموت اټخانق مع واحد من تجار الخشب جدك اتسببله فخسارة كبيرة والراجل جه لجدك عشان يتخانق معاه فجدك طرده وأهانه جامد ادام الناس فالراجل حلف لازم ينتقم منه عشان كده بعت ناس ولعوا فالمعرض والمخزن وللأسف جدك ماكانش مأمن عليهم فالخسارة كانت كبيرة اوي جدك قلبه ما استحملش وجاتله أزمة قلبية وماټ بسببها بعدها عمك عزت كان عايز هو وصفوت يحط إيدهم في إيدين بعض ويحاولوا يعوضوا اللي راح لكن أبوكي رفض وقاله إنه مش عايز أي حاجة من ناحية جدك بعد ماجدك اعترفله وهو بېموت باللي عمله مع فردوس ومعاه وكان عايز يدور على شغل فأي شركة ولا حتى معرض لكن الله يرحمها صفية رفضت وادتله نصيبها في ميراث أبويا الله يرحمه وهو ده اللي ابتدى بيه لكنه خدهم منها على سبيل السلف ولما ربنا فتح عليه ردهم لصفية اصله ماكانش عايز صفية يبقالها فضل عليه والفلوس دي موجودة دلوقتي فالبنك بإسمك يا نورا أما عزت